師奶短評: 回顧67, 左仔, 中共與港英某程度上的默契

回顧歷史, 港英當年鎮壓67, 其實本來已有了撤出香港的最後打算, 後來發現北京仲咪有解放香港的意思, 只係下面d人玩o野玩過界, 得到這個局勢的研判後, 才開始以鐵腕鎮壓左仔和各路革命小將, 英國人做o野, 其行事智慧係好鬼玄妙的, 港英同中共兩個政府少少的眉來眼去, 就已經判斷得到大家想點, 此謂之眉精眼企, 當年港英做O野, 實際上好多O野都會遷就住北京, 例如北京話唔比港人自治或搞民主以免最後演變成港獨, 港英政府就真係唔DO (#1)

當年果班死左仔最痴線o既活動係放炸彈, 聲稱要炸死"白皮豬"(#2), 最賤精的, 是他們放炸彈又唔夠薑去港督府放, 卻拿市民教飛, 用今日o既標準睇返, 佢地其實同恐怖份子無乜分別, 畢竟共產黨就係缺乏人性, 乜都夠膽死, 呢段歷史亦都係影響深遠, 因為香港多數人討厭中共, 都係多得當年呢班"卑鄙..無恥..下流..賤格..o既死左仔"(#3) 好玩唔玩走去玩 pineapple 搞到神憎鬼厭, 憤青到乜, 才會不得人心, 實乃種因受果(#4);

不過我還要說明一點, 左派人士其實對香港社會, 亦有其一定的貢獻, 辦學興教啦, 貫徹到"人人為我, 我為人人"的社區精神啦(最少在香港他們的群體之內如是), 溫情默默地服務社區啦, 難道這貢獻不大嗎? 所以我唔妥蘋果呢篇野有少少抽水唔抹咀之嫌, Label 別人, 行徑好差, 儘管政治對平民老百姓而言本質上只係鐘意同唔鐘意兩件事, 但係有情緒化傾向的刻板觀感, 其實唔係一種好事

至於放炸彈我想只係少數偏激份子先會做, 要怪, 就只能怪毛匪潤芝痴孖筋搞文革, 少數偏激份仔當年頭腦發熱, 可能連自己做緊d乜都唔知, 比共產黨的激情號召催眠左個良心, 認識當年共產黨的朋友都會明白, 中共是一種狂熱的宗教, 有一點點邪教的性質...





C9按:
---------------------------------------
#1 戰後, 港督楊慕琦曾經試圖推出一個港人自治與民主化的計劃, 因受到北京方面的壓力而被永久擱置
#2 白皮豬, 係當年佢地稱呼英國人的種族岐視性貶稱, 從這些稱謂中已可見他們的偏激...
#3 "卑鄙..無恥..下流..賤格..o既死左仔" 乃當年商台一位叫林彬的播音員在節目中對左仔批評, 十分辛辣, 結果林氏兄弟受到左仔暗殺, 慘被燒至重傷不治, 若放諸今天, 一個播音員因做節目已被人以氣油彈燒殺, 簡直係不可思議, 但是當日卻的確發生了這樣野蠻的事
#4 我是一位80後, 極之年輕, 理應唔會知咁多呢d 歷史, 我是從我老豆口述得悉, 由於我討厭中共, 所以我的認識和歷史覺悟肯定唔多客觀, 所以正確與否, 看官唯有自行判斷了...