原創什文: 《六四給我的回憶》

六四給我的回憶

好記得當時我只係讀緊小學, 我地屋企晚晚就係對住個電視,香港成百萬人遊行,同學們間的英雄人物係身繫崩帶的吾爾開希,佢同李鵬對質一幕,令佢紅極一時;o係六四之前幾日,我阿爸仲好沉重咁話,可能會有大屠殺,我問點解(因為當時個個都希望呢個政府會被推翻,香港唔洗收番,亦冇人估到會咁),佢只係講左一句:"因為共產黨就係咁", 成件事由頭到尾,我阿爸都好沉默, 點知看似最冇可能發生o既事,真係發生左....

六四當晚好似係禮拜日清晨黎o既, 最唔可能發生o既事發生左, 個個都呆曬, 之後一連幾日, 香港報紙圖文並茂,我最記得文匯報(當時仲未被共產黨換老總)出左份號外, 簡直係一本四仔!, 要幾恐怖有幾恐怖,坦克車,肉醬意粉,燒焦咸魚,真係睇到呆曬,但係死傷數字好混亂,不過政府滿手血腥一定唔會假,又話d士兵食左藥,殺人特別興奮,傳言滿天...

因為當時太細個,記憶係非常之片斷式,不連貫,就係好想講下,當時,成立左個支聯會,阿李卓人先生挾款被捕於北京三幾日後獲釋,好似話係即時認罪侮過, law 曬d$出黎並寫侮過書先無事, 佢選擇唔做烈士o既英雄事績(相比起王丹,從容被捕坐監)令我印象最深刻....

六四之後,香港新聞報道o既焦點集中o係中國各地民眾點樣o係中共各種措施之下集體淡忘淡化事件,好像大屠殺從未發生,整個過程,我諗身在大陸,一定唔會睇得咁清楚咁真實,同時,對我阿爸話"因為共產黨就係咁"呢句話有了一番好難講得清楚o既體會,自始才開始對歷史產生興趣,年漸長,才發覺必須放低感情因素,道德功過,對歷史的體會才會深入,亦稍稍理解為什麼我阿爸唔遊行,默不作聲,不期望亦不失望是什麼道理,點講都好,相比大陸,好興幸自己身在香港,可以自由而不失真實地看歷史, 不致好大部份大陸人連了解歷史的選擇權都被無聲無色地被褫奪..